بلاقا گؤره




بؤلوم لر
یولداش لار
     
سایغاج
rss feed
عربلی
تورکجه طنز شعیرلر
آنا یارپاق       وطن       ایلگی      
شنبه 14 آذر 1394 :: نويسنده : فتح اله پناهی عربلی
+0 به یه ن

               اوغلانا باخ


قددی اوزون آغیلی اوشاق

اوغلانا باخ اوغلانا باخ

دئیسه آشار بیر شاپالاق

اوغلانا باخ اوغلانا باخ

 

ترققی اولموش اساسی

دلمه دئشیک دیر لباسی

وار قولاغیندا سیرقاسی

شالواریندا اون ایکی یاماق

اوغلانا باخ اوغلانا باخ

 

دوشمز الیندن داراغی

مکتبه هئچ یوخ ماراغی

پارتی دان گلیر سوراغی

بیر تولوق وئر ایچسین عاراق

اوغلانا باخ اوغلانا باخ

 

آتماسا گر تیرامادولی

نه صبری واردیر نه حالی

دوز گئده بیلمزده یولی

اولسا ییخار بیر بوغاناق

توغلانا باخ اوغلانا باخ

 

پول اوسته ائوده چیغیرار

عائیله نی جومله یورار

کافه ده قلیان سومورار

صوبح یاتیب آخشام دوراجاق

اوغلانا باخ اوغلانا باخ

 

هی پیله مج تک پیله نیر

بازاردا داییم سوله نیر

الینده بیر قاب دیله نیر

موتورونا تاپماز یاناجاق

اوغلانا باخ اوغلانا باخ

 

اوزونه قویوب اوغلان آدی

دانیشدیقی سوز هاوادی

درس اوخویور یوخ ساوادی

ذرره تاپیلماز قاناجاق

اوغلانا باخ اوغلانا باخ

 

بویوک لره حورمتی یوخ

رفتارینا دیققتی یوخ

الینده بیر صنعتی یوخ

کیشی لنیب آرواد آلاجاق

اوغلانا باخ اوغلانا باخ

 

زامان چکیب تور گوزونه

باخماز آتانین سوزونه

هر سوزه قاییدیر اوزونه

الده چوماق جیبده پوچاق

اوغلانا باخ اوغلانا باخ

 

نه گلجیه تدبیری وار

نه قالماغا بیر یئری وار

بویون ساخلیان بیری وار

صاباح اونا کیم یاناجاق

اوغلانا باخ اوغلانا باخ

 

انسان اوشاق قالمیر اوغول

آتا آنا اولمور اوغول

اوزگه نظر سالمیر اوغول

سنینده اولاجاق اوشاق

اوغلانا باخ اوغلانا باخ

 

گرگ دیر کی ایشلیه سن

پول گتیریب خشلییه سن

چورگ تاپیب دیشلییه سن

اولماز حیاتدا هی قوناق

اوغلانا باخ اوغلانا باخ

 

آدام یولون سئچ مه لی دیر

راحاتلیقدان کئچمه لی دیر

اوز دونونو بیچ مه لی دیر

بونا نه گرگدی قاشقاباق

اوغلانا باخ اوغلانا باخ





گؤنده ر 100 درجه کلوب دات کام گؤنده ر
بؤلوم : وطن
شنبه 14 آذر 1394 :: نويسنده : فتح اله پناهی عربلی
+0 به یه ن

               آیریلیق

بیلمه زیدیم ابدی بیر آیریلیق وار

آتام آغیر خسته اولاندا بیلدیم

سئون کونول سئودییندن آیریلار

آنام ساچلاری نی یولاندا بیلدیم

 

بیبر آن دا ساق سولا دولاندی اوزو

بیز لری گورمه یه آچیلدی گوزو

بیر معنالی باخیش اولدو سون سوزو

گوزلری قان یاشلا دولاندا بیلدیم

 

باغلادی گوزلرین کسیلدی نفس

داها قولاقیما گلمه دی بیر سس

سببین بیلمه گه ایله دیم هوس

قوللارین یانینا سالاندا بیلدیم

 

ییغیشدی قونشولار یاییلدی خبر

آغ دونو گئیمه گه چکیلدی چپر

مرکبی گتدیلر باشلادی سفر

تانیشلار چینینه آلاندا بیلدیم

 

شرعی طریقت له قویولدو قبره

عالیم آغلایانی چاغیردی صبره

اوردان قاییتماقیم دوننده جبره

مزاردا تکینه قالاندا بیلدیم

 

هامی دوندو ائوه بیر او گلمه دی

آخان گوز یاشیمی گلیب سیلمه دی

سوندو سوسوزلوقدان بیرده گولمه دی

قیزیل گول قاپیدا سولاندا بیلدیم





گؤنده ر 100 درجه کلوب دات کام گؤنده ر
بؤلوم : وطن
جمعه 13 آذر 1394 :: نويسنده : فتح اله پناهی عربلی
+0 به یه ن

                     ارشاد

ارشاد بوقدر سویله کی بیزدن نییه قورخور؟

بیزکی یازیریق هرنه یی اوزدن نییه قورخور؟

اونلار کی بو درنک ده کلیب شعر اوخویوللار

بیربیر کئچیلیر یازدیغی گوزدن نییه قورخور؟

چین دن گتیریلمیش قلمین فایداسی هارد؟

مارماقسا بیزیم جوهری سیزدن نییه قورخور؟

هر بیر یازیلان سوزجوکو حدداد یارادمیش

بیرجه دوزولور جومله یه بیزدن نییه قورخور؟

نوطق انسانا الله طرفیندن کرم اولموش

نظمه چکیلن ساده جه سوزدن نییه قورخور؟

ائو موشکولاتی بیرده کی تقدیر زمانه

چوخداندی سالیب دیر بیزی دیزدن نییه قورخور؟

بیر خان کی اولور هاممی اونون امرینه باغلی

بدباخت نوکردن یا کنیزدن نییه قورخور؟

سرعتله قاچان دوشانی فی الفور توتانلار

باتلاقدا بو گون باتمیش اوکوزدن نییه قورخور؟

ادخال قلمی چرچوبه دن بیر یانا چیخماز

ایندی ده گورک سن بیزه دوزدن نییه قورخور؟





گؤنده ر 100 درجه کلوب دات کام گؤنده ر
بؤلوم : وطن
جمعه 13 آذر 1394 :: نويسنده : فتح اله پناهی عربلی
+0 به یه ن

              چورگ

چورگ قاچیر من قاچیرام دالینجا

جان قوجالیر بیرجه تیکه آلینجا

من پیادا سانکی او بیر آت لی دی

چاتانمیرام گر قاچام قارالینجا

اولمادی بیر گون بو گئنیش دونیادا

باش قویاسان ائوده راحات بالینجا

باخ بو حیاتدان بیر اولوم یاخجی دی

واخت وده سیز دونیادا قوجالینجا

یاتما گئجه یارسی دو گئت میدانا

فعله گزن گوزله گوز سارالینجا

تاپیلماسا ایش یئنه چول یاخجی دی

قاییدیب ائوه دانلاق آلتدا قالینجا

کاسیبلیغین بیرجه منم سوچلو سو

چک میر اوشاق ال باشیمی یولونجا

نیلئییم آرواد منی دوشمور باشا

هی باغیریر قولاقلار کار اولونجا





گؤنده ر 100 درجه کلوب دات کام گؤنده ر
بؤلوم : وطن
جمعه 13 آذر 1394 :: نويسنده : فتح اله پناهی عربلی
+0 به یه ن

          شهریار 

کاغاذ گولومسه دی قلم اوینادی

او گون کی دونیایا گلدی شهریار

یاییلدی هریانا خشگناب آدی

بیرآز کی باخ یاشا دولدو شهریار

 

مین عالم دوغولدو بیر عالم ایچره

عومور سالدی یولا غصه غم ایچره

بوغولدی گوزلری هرآن نم ایچره

کونلونه مین داغی سالدی شهریار

 

نه ایدی ایسته یی نه ایدی دردی؟

بئیم ثریانی بیرجه او گوردو

اوزلوگون بئله بیر سئوگی یه وئردی؟

خوش گونه تامارزی قالدی شهریار

 

بو حاقدیر گوزونه او بیر نازیدی

امما قیزلار کیمی اودا قیزیدی

گئنیش کونلونه بو سئوگی آزیدی

بیر ائلین وورغونواولدو شهریار

 

گورمه یه یوللاندی حیرباباسین

اوز ائلیندن آلدی خئییر دوعاسین

قویدو او بولگه ده ادب بناسین

عالمی حیرتلی قیلدی شهریار

 

دیلینده بیرلشدی بولونموش اوره ک

سوزیله دیرچلدی مین آرزی دیلک

گوردو اوز ایشی نی بیلک بیلمییک

دوزمه دی آغری یا سولدو شهریار

 

بیرجه بیزیم دئییل دونیانین دی او

هر بیر اهل حالین شیدانین دی او

بویوک یاریشمانین میدانین دی او

ظفر نغمه سینی چالدی شهریار

 

اوزون تندیس یونان یئرسیز اینجیدیر

بو شانه شهرته او تندیس نه دیر ؟

ان بویوک هیکلی اوره کلرده دیر

محببت قانانا یولدی شهریار





گؤنده ر 100 درجه کلوب دات کام گؤنده ر
بؤلوم : وطن
پنجشنبه 12 آذر 1394 :: نويسنده : فتح اله پناهی عربلی
+0 به یه ن

حورمتلی دوستوم جناب نظرپورون باجاناق شعیرینه جاواب


                  باجاناق


هنرین جوهری ای دویغولو شاعیر باجاناق

مین بیر اعجازیله سوز یازماغا قادیر باجاناق

سئوگی حاققیندا دئدیم گوجلو چالیرسان قلمی

شاعیر انسان دا بئیم بیر سوزه اینجیر باجاناق

سیزی اینجیتمه یه بیر ایسته ییم اولسایدی اگر

وار گوجومله  ائلییردیم قلمی تیر باجاناق

یاغدیراردیم باشینا بومبا کیمی هی هاوادان

سن لهستان ائله بیل منده کی هیتلر باجاناق

پوشکونه یاخجی سی دوشدو دئمه دیم دیلده بیر آن

لاپ پیسین یازدی منه گور نئجه تقدیر باجاناق

هر قوناقلیقدا یئدین سن خوروزون دوش بودونو

آزاقاققانی منه توللادی کفگیر باجاناق

جمع اولاندا چاغیریلدین بالا مجلیس باشینا

چایچی اولدوم یاداکی پیکانا شوفیر باجاناق

شانسیم اولسایدی اگر آنلیان ایستردی منی

یوخسا تاپمازدی بئله بانلیان آخیر باجاناق

وار اوره گده ائله نیسگیل یئری یوخ بوردا دییم

آچمیاق اوستونو قالسین آرادا سر باجاناق

سئوگی تک انسانا شامیل اولا بیلمز بیلیرم

ان اساس سئومه لی دونیاده وطن دیر باجاناق

یازدیقیم جیزماقارا طنزده اولسا آجی دیر

گتیریب تنگه یازیم چوخلو اکابیر باجاناق

شوکور اللها بوتون موضوعدا یازمیش قلمین

اوخویورسیز بیزه درنک ده ده بیر بیر باجاناق

شعریوین دویغوسو هربیر کسی حیرتده قویور

نئجه کی آغزی آچیق قالدی عجبشیر باجاناق

من دئسم چون قوهوموق بلکه ده اغراق ساییلار

قیلسین اقراری بونو یا قوجا تفسیر باجاناق

قارا دفترده گئدیب دیر آدینیز فخر ائلیین

قویار البتته بو گنج انسانا تاثیر باجاناق

ائله هم یاشدا بویوک سیز همیده باشدا بویوک

وارلیغیز تانرییا ائتمیش منیشاکیر باجاناق

گورونور ذکر علی دیر دیلیزین ازبری چوخ

خوش اولار شعر آدینیز گر اولا ذاکیر باجاناق

بیزه اولسون نظریز چونکی نظر صاحبی سیز

گوناهیم اولسادا کئچ بالدیزا خاطیر باجاناق

جان دییب جان اشیدک هاممینی حیرتده قویاق

قالایاق دوشمانی یاندیر ماغا تندیر باجاناق





گؤنده ر 100 درجه کلوب دات کام گؤنده ر
بؤلوم : وطن
پنجشنبه 12 آذر 1394 :: نويسنده : فتح اله پناهی عربلی
+0 به یه ن

       فلک

فلک نه دندی دونیادا

بولبوللر حسرت دی گوله

محببتی قانان انسان

یانایانا دونور کوله

 

نه دن مردی خوار ایله دین

درده گرفتار ایله دین

گوزلرین آغلار ایله دین

دوشدو ایشلری موشکوله

 

بیری ناچار قایا یاردی

بیری سینی سئل آپاردی

بیری مین فریاد قوپاردی

مجنون اولوب دوشدو چوله

 

دییم ایشین جنایت دی

سئون لرله عدوات دی

گوزللرده نه عادت دی

جان آلیرلار گوله گوله

 

عربلی یم بو دونیادا

کیمیم واردی یئته دادا؟

جاوانلیقیم گئتدی بادا

بی وفا یار بیله بیله





گؤنده ر 100 درجه کلوب دات کام گؤنده ر
بؤلوم : وطن
چهارشنبه 11 آذر 1394 :: نويسنده : فتح اله پناهی عربلی
+0 به یه ن

          یار اشیدسین


دردیمی سازین دیلیندن

دییرم قوی یار اشیدسین

قیلدیغی ظولمون الیندن

احوالیمی زار اشیدسین

 

اوزگون اوزگون یانایانا

سیزیلدییم بلکه قانا

داها اولموشام دیوانا

یامان دردیم وار اشیدسین

 

بیله دونیا منه داردی

اوندا هله گوزوم واردی

وفاسیزدان یادگاردی

سینه مده داغلار اشیدسین

 

شیرین دیلین صحبتین دن

خومار گوزون فرقتین دن

عربلی یم حسرتین دن

گوزلریم آغلار اشیدسین





گؤنده ر 100 درجه کلوب دات کام گؤنده ر
بؤلوم : وطن
چهارشنبه 11 آذر 1394 :: نويسنده : فتح اله پناهی عربلی
+0 به یه ن

           یار اولمادی

سئوگی سئوداسی له گزدیم سئودیگیم یاراولمادی

غرق دریای غم اولدوم کیمسه غمخوار اولمادی

مسلخ عشقه چکیلدیم چاره سیز پروانه تک

خسته جانیم لایق شمع جفاکار اولمادی

نقد جان الده دولاندیم بیر وفاسیز کویینی

قالدی حئیران اورتالیقدا اول خریدار اولمادی

تیر مژگانین روان قیلدی مکددر قلبیمه

نیلییم بیر لحظه غمخوار دل زار اولمادی

بیر ساغالماز درده سالدی کونلومو هیجران غمی

آلدانیب اغیاره جانانیم پرستار اولمادی

مین تمنا ایله دیم سون قویدو بلکه ظولمونه

اما بو ظالیم کیمی دونیاده غدار اولمادی

قالدین حسرت ای عربلی سن او شیرین لب لره

طوطی جان نایل لعل شکر بار اولمادی





گؤنده ر 100 درجه کلوب دات کام گؤنده ر
بؤلوم : وطن
چهارشنبه 11 آذر 1394 :: نويسنده : فتح اله پناهی عربلی
+0 به یه ن

                  حالوا


بیر گون آنام قیلدی ائوی تر تمییز

سویله دی واردیر بوگونه روضه میز

گولومسه دیم توکدو بیرآز قاشقاباق

یاتماغا گوستردی منه بیر اوتاق

قورخودان البت آنامی حاقلادیم

گئتدیم اوتاقدا اوزانیب یوخلادیم

بیر آز اوتدو سوخییا قالمیش قارین

آجدی اله آلدی عاغیل اوسارین

گلدی یامان بورنوما خوش بیر قوخو

اولدو سبب قاچدی گوزومدن یوخو

چون یئمه گه گئت به گئت آرتدی ماراغ

یاواش یاواش مطبخه قویدوم ایاغ

ایستی حالوا جومله طاباقلار دولو

آنام تامام دولدوروبدی ساق سولو

بوش دئییلدی بیر یئر ایاق باسماغا

سویله دیم آنجاق قبول ائتسین آغا

بیرده گوردوم حالوایا باتدی قیچیم

بربزه یین یامانجا قاتدی قیچیم

بیرجه تیکه زهر دیمه میش دیشه

شانسیما باخ گور نئجه قالدیم ایشه

تئزاوتاقا قاچدیم آنام گورمه سین

بلکه بو شیلتاخلیغیمی بیلمه سین

بیر آز سونرا قوپدو یامان داد هارای

دئدیم چیخدی باخ ایشیمین گندی وای

دردیمه یالوارماغی بیلدیم چارا

قورخا قورخا یاخینلاشدیم اونلارا

گوردوم عجب چاتان دویور باشینا

یول ائلیییرلر  اوزو  گوز یاشینا

کئچمه دی چوخ قونشولاردا گلدیلر

ماجرانی مندن اول بیلدیلر

واردی مثل چاتدی خبر نرگیزه

نور سرعتیله یایاجاق تبریزه

فیکیرله شدیم یوخدو باخان چوخ منه

هئچ بو ایشین باغلیلیغی یوخ منه

ایره لی لئییب اونلارا تئز قاریشدیم

بیرین توتوب ماجرانی سوروشدوم

باخیدی منه هونکور هونکور آغلادی

آغلاماغی اوره ییمی داغلادی

یاده سالیبدیر دئدی حضرت بیزی

حالوایا دوشموش او موبارک ایزی

ایسته دیم اوول بیر اوره کدن گولم

سونرا دئدیم یوخ هله تئزدیر اولم

جوشه گلیب لر بو چتین دیر چتین

دینسن اگر بوردا دیدللر اتین

ایندی بولار آغیلی ساتیب احساسا

یوخ دانیشیب آنانی باتیرما یاسا

تئز سوساراق آغزیما ویردیم قیفیل

قورخودان آتدیم طاباقا بیرده پول

بیری آرادا فاطی نه نه گلسین دئدی

معجزییه بیر چارا قیلسین دئدی

گلدی فاطی سویله دی یاللعجب

سییده دیر چون آغایا منتسب

دویدو باشا چون ایزه دوشدو گوزو

بیر آز کئچدی باخ بئله اولدو سوزو

واردی کیمین نییتی اوول دئسین

اوچ دفه قررا صالاوات سویله سین

امر ائله دی سونرادان آروادلارا

یاخینلارا قونشولارا یادلارا

ایزلی طاباقدان گوتورون حالوانی

جومله طاباقلاردا قاتین سیز اونو

بیرده گئدین محله نی تئز هایلایین

بولوم بولوم حالوانی سیز پایلایین

لاپ کوچه دن دوردو قاطار قونشولار

آغلایا آغلایا حالوا آلدیلار

آخشام اولدو هاممی ییغیشدی ائوه

گلین باجی یئزنه داداش هم نوه

یاواش یاواش هرکس حالوا یئییردی

بیر تیکییه اوچ صالاوات دییردی

آتام سالدی باشیما بیردن قاپاز

تبرریکدی یه حالوا آخماق بیرآز

معجیزه نین عیللتی آنجاق منم

ایندی آغیللی هامی آخماق منم

هرکس اباالفض دییرک توتدو دم

حیطتده سانجیلدی اوجا بیر علم

چاتدی خبر هر یئره گلدی قوناق

اولدو نهایت ائویمیز بیر اوجاق

گونده دولور آخ نئجه پولدان علم

باخ بئله یوخوللوغسا چکدیک قلم





گؤنده ر 100 درجه کلوب دات کام گؤنده ر
بؤلوم : وطن
یارپاق لار : 1 .. 8 9 10 11 12 13
 
   
 
Powerd By : ARZUBLOG.COM Theme Designer : MyTheme.ir