بلاقا گؤره




بؤلوم لر
یولداش لار
     
سایغاج
rss feed
عربلی
تورکجه طنز شعیرلر
آنا یارپاق       وطن       ایلگی      
سه شنبه 28 دی 1395 :: نويسنده : فتح اله پناهی عربلی
+0 به یه ن
آی قیز 


قوربان اولوم گوزلرینه 
بالدان شیرین سوزلرینه 
ایاق قویوب ایزلرینه 
گلیب سوراخلارام سنی 

آی قیز  اوزون گوزل گولسن
 طوطی کیمی شیرین دیلسن 
باغبان اولوب بونو بیل سن 
گیزلین اوراخلارام سنی

الینده بیر سازیندا وار 
گول چیچکلی یازیندا وار 
عشوه ن ده وار،نازیندا وار 
هرآن ماراخلارام  سنی 
 
ملک سن حوری سن نه سن ؟
اولما بئله اومود کسن
ویجدان حاققی بیر هه دئسن 
بوگون آداخلارام  سنی

گوزلییرم گولوم جاواب 
اوره ییمی قیلما کاباب 
سن بیر اوخونمامیش کتاب 
تامام واراقلارام  سنی

ساچلارینی آلیب اله 
هوروب اونو گوله گوله 
آچیب توکنده سن یئله 
گولوم داراقلارام  سنی

آلیر جانی قارا تئلین 
وئر الیمه او گول الین 
گلسن اگر بیزه گلین 
گوز اوسته ساخلارام سنی 



عربلی




گؤنده ر 100 درجه کلوب دات کام گؤنده ر
بؤلوم : وطن
سه شنبه 28 دی 1395 :: نويسنده : فتح اله پناهی عربلی
+0 به یه ن
ماشینلارین فرقی

آی جاماعات بیر دئییل هئچ ماشینلار 

اونلاریندا بیر بیریله فرقی وار 

اورنک اوچون پورشه ایله پرایدین 

تفاوتین قیلیم ایندی جه آیدین 

هرزامان کی پرایدا اولدون سوار 

بیر نظر ائت دوور بره گور نه وار 

عزراییل دی بو ایله شن یانیندا 

قالیب فیکری بیرجه سنین جانیندا 

داها بو دونیادان قارداش اوز الین 

چون اوخویور آیریلیقین غزلین 

گلیب دی او آلماغا جان، گئدیرسن

حالاللیق آل بو دونیادان گئدیرسن


پورشه ده یانیندا حوری ایله شیر 

اوزونده گونشین نوری ایله شیر 

گوزللیکده گوزللرین گوزلی 

هئی اوخویور سنه سئوگی غزلی 

یاواش یاواش عشوه له نیر نازلانیر 

ماشیندا کی اوز اوزونه گازلانیر

جان آلمیر او لاپ دا سنه جان وئریر 

محبت له حیاتا ایمکان وئریر 

روحلاندیریر بئله یولداشین سنی 

نه یول یورور والله نه ماشین سنی


عربلی




گؤنده ر 100 درجه کلوب دات کام گؤنده ر
بؤلوم : وطن
سه شنبه 28 دی 1395 :: نويسنده : فتح اله پناهی عربلی
+0 به یه ن
سیچان 

ائوله نیردی بیر مئشه نین سولطانی 

آدلی سانلی هم ده گوجلو آسلانی

چاغیردی آسلان بوتون حیوانلاری 

گلیب بو توی دا دورولا قانلاری 

هر طرفدن دسته دسته گلدیلر 

یاواش یاواش تویدا دئییب گولدولر

یئییب، ایچیب چالدیلار اویناشدیلار 

راحات راحات هر یئره قایناشدیلار 

واریدی او جمع ایچینده بیر سیچان 

آتدی تیکه آسلانا باخدی هاچان 

آخیردا بیردن بوغازین دیکله دی 

قارداش دئییب آسلانی تبریک له دی 

گوروم گوزل تویون موبارک اولسون 

حایاتدا اوره یین سئوینجه دولسون

قارداش سنی دهریده خوشباخت یاشا

اوز گول اوزلو یارینلا قاری قوشا 

توی بئی ده باشقا بیر آسلانیدی 

مجلسه او سانکی نگهبانیدی 

اشید جه یین گلدی اونون یانینا 

ولوله سالدی او کیچیک  جانینا

چکمه دی بیر ثانیه گلدی چاتدی 

تئز سیچانین بوغازینا ال آتدی 

سویله دی گور سن هارا آسلان هارا؟ 

ایندی چکیم من سنی بوردا دارا؟

آی بالا آخماق بو دییل باخ جانین؟ 

ایستییرسن بوردا توکوم من قانین؟ 

سیچان دئدی مینمه تئز جین آتینا 

بلی ایندی چاتمارام هئچ قاتینا 

امما بیر گون منده بیرآسلانیدیم 

مئشه لیکده سولطانیدیم ،خانیدیم

گوج واریدی سیزین کیمی قولومدا 

کیمسه دورا بیلمه زیدی یولومدا 

حوکمداریدیم بالا حوکموم روا 

ائوله نیب اولدوم بئله بیر بینوا 

هرنه واریدی الیمدن آلدیلا

منی بوجور یامان گونه سالدیلار

تاپدی یامان بیر آفی نامرد منی 

سیخدی بئله غصه منی، درد منی 

چون اری دی  گون به گون حایاتدا جان

بیرده گوردوم قارداش اولموشام سیچان 


عربلی




گؤنده ر 100 درجه کلوب دات کام گؤنده ر
بؤلوم : وطن
+0 به یه ن
دئییشمه  (عربلی ومهسا)


نه گلیر ایشیقین نده چراغین 
سویله ندن سولوب باهارین باغین؟
گرک هران من چکم سنین داغین؟
بیرسلام یاز اورگیمی شاد ائله
کونلوم سنسیز ویراندی اباد ائله

مهسا

کونول سالیب سنه مهسا ماراغی 
گورمه دین هئچ بو ایشیقلی چیراغی 
بارماقلاریم ساچلارینین داراغی 
سن ده منی هردن بیرآز یاد ائله 
اوره ییمی غصه دن آزاد ائله

عربلی

منده وفاواردی امماسنده یوخ
اینان وفالیام هران چوخدی چوخ 
بیلیردیم کی سن کی اولدون قارنی توخ
بیلیردیم کی سالارسان منی چوله
کونلوم سنسیز ویراندی اباد ائله

مهسا

قارنیم توخدو ایندی یئدیم چون شامی 
هله واردی اونون آغیزدا تامی 
وفادارام بیلیر بونو قیز هامی 
آختار دوشوب آدیم دیللردن دیله 
سن تک وفاسیز آخی نئجه بیله

عربلی

گر اولسایدین یاشدا بیرآز جا تاییم 
اولاردی سنه چوخ سئوگی دن پاییم 
سن جاهیل من آهیل نئجه اویناییم 
جان آلیرسان ایندی باخ گوله گوله 
عشوه ساتیرسان بو قوجا بولبوله

عربلی 

ندن باشقا سئوگی لره یانیرسان ؟
ندن منی یالقیز سانیب دانیرسان ؟
ندن گوزللره همدم اولورسان؟
ندن گوزیاشیمی چئوردین سئله؟
ندن اخیرمنی گتیردین دیله؟

مهسا

من نئیلییم سئوگی اوره ک ایشی دی 
باخماز اصلا بو ارکک دی دیشی دی 
گوزللیگی سئون اصیل کیشی دی 
سن شاعیرسن سئوگی نی بیله بیله 
سورغولارری ندن گتیردین دیله

عربلی 

نه یاز گلیر نده چیچکلی باهار
نه صبریم وار نه قراریم نه ده یار
گئجه لر چکیرم بوتون اه و زار
ساتدین منی اوزومه گوله گوله
گئد گوزلیم باشقاسینی شاد ائله

مهسا

نه باهاری گول چیچکلی یاز اوزون 
عشوه اوزون غمزه اوزون ناز اوزون 
یار و قرار تاپمالیسان قیز اوزون 
چونکی زامان ایندی بئله دی بئله 
چالیش مهسا سن کونلووو شاد ائله

عربلی

بوسئوگی دن گورمدیم هچ بیر وفا
گئجه گوندوز هران چکیرم جفا
گوچورم دونیادان اومود آللاها
ترک جهان ائدیرم بیله بیله
شادقال شادیاشا هران گوله گوله

مهسا

تلسمه قیز گلجه یین وار هله 
تانری سنه یئتیرجک یار هله 
اله نه جک اوره یینه قار هله 
آغلاما چوخ قاش گوزونو سورمه له 
یار قوینوندا جانین اله دینجله

عربلی

گلمه بیرداهادا مزاریم اوسته
گتیمه خوش گوللری دسته دسته 
وصییتیم بودور .. آی بویی بسته 
باشقاسینین گوزلرینی سورمله
کونلوم ایستر مزاردابیردینجله

مهسا

نه لر چیخیر قیز سنین دوداغیندان 
مزاردان یوخ دانیش توی اوتاغیندان 
محبت له قورولموش یاتاغیندان 
گلین اولوب بئ له توتون  ال اله 
هردن اونو زارافاتا سیلکه له

عربلی




گؤنده ر 100 درجه کلوب دات کام گؤنده ر
بؤلوم : وطن
جمعه 10 دی 1395 :: نويسنده : فتح اله پناهی عربلی
+0 به یه ن
تانری یا مکتوب 

بیر گون پست ایشچی سی بیر مکتوب آلدی 
باخدی عنوانینا الینده قالدی 
بوییدی عنوانی تانری یا چاتسین 
ایسته دی مکتوبو الیندن آتسین 
دییشدی فیکرینی قاییتدی گئری 
دئدی بو مکتوبون واردی بیر سیری 
صاباح کی گلدی او تئز ایش باشینا 
دانیشدی بیر به بیر امکداشینا 
اله کی صوحبتی، سوزو قاندیلار
مکتوبا باخماغا ماراخلاندیلار
بیربیر امکداش لار نشان وئردیلر 
آچدیلار مکتوبو بئله گوردولر 
یازیب دی تانری یا بیر قوجا قادین 
مکتوبون آلتیندا نشانین آدین
احتیاج اوزوندن گلیب دی دیله 
ایاق باش مکتوبدا یازیلیب بئله 
سالام اولسون سنه بویوک  یارادان 
قالدیر یوخسوللوغو منده آرادان 
یاشلی بیر قادینام تقایود چی یم 
یوخ سندن باشقاسی دردیمی دییم 
بللی دی حایاتدا نئجه قالدیغیم 
بو آیدان او آیا چاتمیر آلدیغیم 
هله قاباخدا باخ آد گونوم ده وار 
نه اولار وئره سن منه یوز دلار؟
آخی یولداشلاریم گلجک قوناق 
اله یانلاریندا سن اوزومو آغ 
قوناغین ایچمه سی یئمه سی واردی 
گئدیب هریاندادا دئمه سی واردی 
قیل منیم دردیمه اوزون بیر چارا 
اوزوم یانلاریندا اولماسین قارا
ایشچی لر اوخویوب درده دولدولار 
چارا قیلماق اوچون فیکره قالدیلار 
دانیشیب وئردیلر بئله بیر قرار 
وئره هربیر کسین جیبینده نه وار
بیر به بیر گزدیلر او استوللاری 
اوست اوسته قویدولار گلن پوللاری 
دوخسان یئددی دولار اولدو جمعینده 
دئدیلر بسی دی خرجه همین ده
مکتوبا قویدولار تئز او پوللاری 
اونون عنوانینا گئتدی یوللاری 
قادین بیر ایشچی دن مکتوبو آلدی 
پوللاری گورجه یین سئوینجه دولدو 
اوده دی بورجلارین بیر به بیر او گون 
حیاتدا قالمادی داها بیر دوگون
آد گونونه چوخلی دعوت ایله دی 
گلنلره گوزل حورمت ایله دی 
اله کی شنلیگی اولدو دای تامام 
قالمادی آرزی سی اونون والسلام
آلدیغی پوللار لا کی دارتدی دنین 
ایش قوتاردی آرزیلاری اولدو چین 
تشککرون یازماغا وئردی قرار 
سویله دی او اللها ای لوطف کار 
یوللادیغین پوللارا چوخ ممنونام 
قویمادی یوخسللوق ایچینده یانام
لوطف اله دین تا اودویم بورجومی 
هم ده کی باخ آد گونومه خرجیمی 
پوللارین بیر قیسمینه آلدیم چاخیر
دعوت ائتدیم دوستلاریمی بیر ناخیر 
گویول لری ایستییه نی سئچدیلر 
دویونجا بوردا یئدیلر ایچدیلر 
مست اولاراق دوردو هامی اوینادی 
واردی هله آغیزدا شنلیک دادی 
سانکی بو قیش بیزلره بیر یازیدی 
اما پولون اوچ جه دولار آزیدی 
شکر ائدیرم من سنه ای قبله گاه 
بو آزلیقدا یوخیدی سنده گوناه 
دیلیمده ازبردی همیشه آدین 
یوز دولاری سن منه دوز یوللارین 
اوچ دولاری اوغورلاییب پستچی لار 
وار یقینیم اوغرودو تانریم اولار 
عیبی یوخدو چوخ شوکور اولسون سنه 
یادا سالیب لوطف الییب سن منه 
یازدی یئنه تانری نین عنوانینا 
بیرینجی مکتوبون نم نشانینا 
پستچی لار آلجاق اونو تئز آشدیلار 
اوخودولار امما یامان چاشدیلار 
یاخجی لیقین عاقبتین بیلدیلر 
یانا یانا آجی آجی گولدولر

عربلی




گؤنده ر 100 درجه کلوب دات کام گؤنده ر
بؤلوم : وطن
+0 به یه ن
طالعیمیز تلگرامدا یازیلدی 
 

گوزوم دوشدو گروپدا بیر گوزه له 
اوز گتیردیم تئز شعیره، غزله 
او  اوخویا بلکه ایشیم دوزه له 
دوشدوم ایشه ایتیرمه دن زامانی


لایک اله دی او آن باشلادیق چته 
یازا یازا  ایلیشدیم محبته 
گوندن گونه سالدی منی موحنته 
قیریلدی لاب اوره ییمین آمانی


سوردوم آدین یازدی آدیم  فغانه 
احسن اولسون دئدیم سنی دوغانا 
جئیرانی تک یاراشارسان موغانا
کیم بوراخار بئله قاشی کامانی؟


جان آلیردی اوسته گوزل شکیلی 
آچیق باشدا هم ساریشین  ککیلی 
دئدیم اولسون حایاتیمین وکیلی
دوشونجه مین گلدی اونا گومانی


طالعیمیز تلگرامدا یازیلدی 
پیوی آدلی گیزلی دامدا یازیلدی 
آی، اولدوزلی بیر  آخشام دا یازیلدی
چکیلدی تنهالیق چنی، دومانی


گونو گوندن سئوگی میز گوج تاپیردی 
خیاللاردا  اوز آتینی چاپیردی 
بئیم اوره ک بیربیریندن قوپوردو؟
بو سئوگی نین اولمادی گوز یومانی


بیر گون اولدو قرار وئردی گورمه یه 
گورکمین دن گوزلریم گول درمه یه 
ساچلارینی اللریمله هورمه یه 
بلکه گوروب کامیل ائدم ایمانی


فغانه نی گوردوم آنام یاشیندا 
آغ توکلری بللی ائیری قاشیندا 
ایکی باتمان خینا واردی باشیندا 
خاطیرلاتدی قونشوموز گولثومانی


بیرآن باخیب لاپ اوزومو ایتیردیم 
سونرا قاچیب کوچه میزه یئتیردیم 
بئله لیکله بو سئودانی بیتیردیم 
سئومییه جم بیرده ،قویدوم یامانی


عربلی




گؤنده ر 100 درجه کلوب دات کام گؤنده ر
بؤلوم : وطن
یارپاق لار : 1
 
   
 
Powerd By : ARZUBLOG.COM Theme Designer : MyTheme.ir