بلاقا گؤره




بؤلوم لر
یولداش لار
     
سایغاج
rss feed
عربلی
تورکجه طنز شعیرلر
آنا یارپاق       وطن       ایلگی      
جمعه 13 آذر 1394 :: نويسنده : فتح اله پناهی عربلی
+0 به یه ن

          شهریار 

کاغاذ گولومسه دی قلم اوینادی

او گون کی دونیایا گلدی شهریار

یاییلدی هریانا خشگناب آدی

بیرآز کی باخ یاشا دولدو شهریار

 

مین عالم دوغولدو بیر عالم ایچره

عومور سالدی یولا غصه غم ایچره

بوغولدی گوزلری هرآن نم ایچره

کونلونه مین داغی سالدی شهریار

 

نه ایدی ایسته یی نه ایدی دردی؟

بئیم ثریانی بیرجه او گوردو

اوزلوگون بئله بیر سئوگی یه وئردی؟

خوش گونه تامارزی قالدی شهریار

 

بو حاقدیر گوزونه او بیر نازیدی

امما قیزلار کیمی اودا قیزیدی

گئنیش کونلونه بو سئوگی آزیدی

بیر ائلین وورغونواولدو شهریار

 

گورمه یه یوللاندی حیرباباسین

اوز ائلیندن آلدی خئییر دوعاسین

قویدو او بولگه ده ادب بناسین

عالمی حیرتلی قیلدی شهریار

 

دیلینده بیرلشدی بولونموش اوره ک

سوزیله دیرچلدی مین آرزی دیلک

گوردو اوز ایشی نی بیلک بیلمییک

دوزمه دی آغری یا سولدو شهریار

 

بیرجه بیزیم دئییل دونیانین دی او

هر بیر اهل حالین شیدانین دی او

بویوک یاریشمانین میدانین دی او

ظفر نغمه سینی چالدی شهریار

 

اوزون تندیس یونان یئرسیز اینجیدیر

بو شانه شهرته او تندیس نه دیر ؟

ان بویوک هیکلی اوره کلرده دیر

محببت قانانا یولدی شهریار





گؤنده ر 100 درجه کلوب دات کام گؤنده ر
بؤلوم : وطن
پنجشنبه 12 آذر 1394 :: نويسنده : فتح اله پناهی عربلی
+0 به یه ن

حورمتلی دوستوم جناب نظرپورون باجاناق شعیرینه جاواب


                  باجاناق


هنرین جوهری ای دویغولو شاعیر باجاناق

مین بیر اعجازیله سوز یازماغا قادیر باجاناق

سئوگی حاققیندا دئدیم گوجلو چالیرسان قلمی

شاعیر انسان دا بئیم بیر سوزه اینجیر باجاناق

سیزی اینجیتمه یه بیر ایسته ییم اولسایدی اگر

وار گوجومله  ائلییردیم قلمی تیر باجاناق

یاغدیراردیم باشینا بومبا کیمی هی هاوادان

سن لهستان ائله بیل منده کی هیتلر باجاناق

پوشکونه یاخجی سی دوشدو دئمه دیم دیلده بیر آن

لاپ پیسین یازدی منه گور نئجه تقدیر باجاناق

هر قوناقلیقدا یئدین سن خوروزون دوش بودونو

آزاقاققانی منه توللادی کفگیر باجاناق

جمع اولاندا چاغیریلدین بالا مجلیس باشینا

چایچی اولدوم یاداکی پیکانا شوفیر باجاناق

شانسیم اولسایدی اگر آنلیان ایستردی منی

یوخسا تاپمازدی بئله بانلیان آخیر باجاناق

وار اوره گده ائله نیسگیل یئری یوخ بوردا دییم

آچمیاق اوستونو قالسین آرادا سر باجاناق

سئوگی تک انسانا شامیل اولا بیلمز بیلیرم

ان اساس سئومه لی دونیاده وطن دیر باجاناق

یازدیقیم جیزماقارا طنزده اولسا آجی دیر

گتیریب تنگه یازیم چوخلو اکابیر باجاناق

شوکور اللها بوتون موضوعدا یازمیش قلمین

اوخویورسیز بیزه درنک ده ده بیر بیر باجاناق

شعریوین دویغوسو هربیر کسی حیرتده قویور

نئجه کی آغزی آچیق قالدی عجبشیر باجاناق

من دئسم چون قوهوموق بلکه ده اغراق ساییلار

قیلسین اقراری بونو یا قوجا تفسیر باجاناق

قارا دفترده گئدیب دیر آدینیز فخر ائلیین

قویار البتته بو گنج انسانا تاثیر باجاناق

ائله هم یاشدا بویوک سیز همیده باشدا بویوک

وارلیغیز تانرییا ائتمیش منیشاکیر باجاناق

گورونور ذکر علی دیر دیلیزین ازبری چوخ

خوش اولار شعر آدینیز گر اولا ذاکیر باجاناق

بیزه اولسون نظریز چونکی نظر صاحبی سیز

گوناهیم اولسادا کئچ بالدیزا خاطیر باجاناق

جان دییب جان اشیدک هاممینی حیرتده قویاق

قالایاق دوشمانی یاندیر ماغا تندیر باجاناق





گؤنده ر 100 درجه کلوب دات کام گؤنده ر
بؤلوم : وطن
پنجشنبه 12 آذر 1394 :: نويسنده : فتح اله پناهی عربلی
+0 به یه ن

       فلک

فلک نه دندی دونیادا

بولبوللر حسرت دی گوله

محببتی قانان انسان

یانایانا دونور کوله

 

نه دن مردی خوار ایله دین

درده گرفتار ایله دین

گوزلرین آغلار ایله دین

دوشدو ایشلری موشکوله

 

بیری ناچار قایا یاردی

بیری سینی سئل آپاردی

بیری مین فریاد قوپاردی

مجنون اولوب دوشدو چوله

 

دییم ایشین جنایت دی

سئون لرله عدوات دی

گوزللرده نه عادت دی

جان آلیرلار گوله گوله

 

عربلی یم بو دونیادا

کیمیم واردی یئته دادا؟

جاوانلیقیم گئتدی بادا

بی وفا یار بیله بیله





گؤنده ر 100 درجه کلوب دات کام گؤنده ر
بؤلوم : وطن
چهارشنبه 11 آذر 1394 :: نويسنده : فتح اله پناهی عربلی
+0 به یه ن

          یار اشیدسین


دردیمی سازین دیلیندن

دییرم قوی یار اشیدسین

قیلدیغی ظولمون الیندن

احوالیمی زار اشیدسین

 

اوزگون اوزگون یانایانا

سیزیلدییم بلکه قانا

داها اولموشام دیوانا

یامان دردیم وار اشیدسین

 

بیله دونیا منه داردی

اوندا هله گوزوم واردی

وفاسیزدان یادگاردی

سینه مده داغلار اشیدسین

 

شیرین دیلین صحبتین دن

خومار گوزون فرقتین دن

عربلی یم حسرتین دن

گوزلریم آغلار اشیدسین





گؤنده ر 100 درجه کلوب دات کام گؤنده ر
بؤلوم : وطن
چهارشنبه 11 آذر 1394 :: نويسنده : فتح اله پناهی عربلی
+0 به یه ن

           یار اولمادی

سئوگی سئوداسی له گزدیم سئودیگیم یاراولمادی

غرق دریای غم اولدوم کیمسه غمخوار اولمادی

مسلخ عشقه چکیلدیم چاره سیز پروانه تک

خسته جانیم لایق شمع جفاکار اولمادی

نقد جان الده دولاندیم بیر وفاسیز کویینی

قالدی حئیران اورتالیقدا اول خریدار اولمادی

تیر مژگانین روان قیلدی مکددر قلبیمه

نیلییم بیر لحظه غمخوار دل زار اولمادی

بیر ساغالماز درده سالدی کونلومو هیجران غمی

آلدانیب اغیاره جانانیم پرستار اولمادی

مین تمنا ایله دیم سون قویدو بلکه ظولمونه

اما بو ظالیم کیمی دونیاده غدار اولمادی

قالدین حسرت ای عربلی سن او شیرین لب لره

طوطی جان نایل لعل شکر بار اولمادی





گؤنده ر 100 درجه کلوب دات کام گؤنده ر
بؤلوم : وطن
چهارشنبه 11 آذر 1394 :: نويسنده : فتح اله پناهی عربلی
+0 به یه ن

                  حالوا


بیر گون آنام قیلدی ائوی تر تمییز

سویله دی واردیر بوگونه روضه میز

گولومسه دیم توکدو بیرآز قاشقاباق

یاتماغا گوستردی منه بیر اوتاق

قورخودان البت آنامی حاقلادیم

گئتدیم اوتاقدا اوزانیب یوخلادیم

بیر آز اوتدو سوخییا قالمیش قارین

آجدی اله آلدی عاغیل اوسارین

گلدی یامان بورنوما خوش بیر قوخو

اولدو سبب قاچدی گوزومدن یوخو

چون یئمه گه گئت به گئت آرتدی ماراغ

یاواش یاواش مطبخه قویدوم ایاغ

ایستی حالوا جومله طاباقلار دولو

آنام تامام دولدوروبدی ساق سولو

بوش دئییلدی بیر یئر ایاق باسماغا

سویله دیم آنجاق قبول ائتسین آغا

بیرده گوردوم حالوایا باتدی قیچیم

بربزه یین یامانجا قاتدی قیچیم

بیرجه تیکه زهر دیمه میش دیشه

شانسیما باخ گور نئجه قالدیم ایشه

تئزاوتاقا قاچدیم آنام گورمه سین

بلکه بو شیلتاخلیغیمی بیلمه سین

بیر آز سونرا قوپدو یامان داد هارای

دئدیم چیخدی باخ ایشیمین گندی وای

دردیمه یالوارماغی بیلدیم چارا

قورخا قورخا یاخینلاشدیم اونلارا

گوردوم عجب چاتان دویور باشینا

یول ائلیییرلر  اوزو  گوز یاشینا

کئچمه دی چوخ قونشولاردا گلدیلر

ماجرانی مندن اول بیلدیلر

واردی مثل چاتدی خبر نرگیزه

نور سرعتیله یایاجاق تبریزه

فیکیرله شدیم یوخدو باخان چوخ منه

هئچ بو ایشین باغلیلیغی یوخ منه

ایره لی لئییب اونلارا تئز قاریشدیم

بیرین توتوب ماجرانی سوروشدوم

باخیدی منه هونکور هونکور آغلادی

آغلاماغی اوره ییمی داغلادی

یاده سالیبدیر دئدی حضرت بیزی

حالوایا دوشموش او موبارک ایزی

ایسته دیم اوول بیر اوره کدن گولم

سونرا دئدیم یوخ هله تئزدیر اولم

جوشه گلیب لر بو چتین دیر چتین

دینسن اگر بوردا دیدللر اتین

ایندی بولار آغیلی ساتیب احساسا

یوخ دانیشیب آنانی باتیرما یاسا

تئز سوساراق آغزیما ویردیم قیفیل

قورخودان آتدیم طاباقا بیرده پول

بیری آرادا فاطی نه نه گلسین دئدی

معجزییه بیر چارا قیلسین دئدی

گلدی فاطی سویله دی یاللعجب

سییده دیر چون آغایا منتسب

دویدو باشا چون ایزه دوشدو گوزو

بیر آز کئچدی باخ بئله اولدو سوزو

واردی کیمین نییتی اوول دئسین

اوچ دفه قررا صالاوات سویله سین

امر ائله دی سونرادان آروادلارا

یاخینلارا قونشولارا یادلارا

ایزلی طاباقدان گوتورون حالوانی

جومله طاباقلاردا قاتین سیز اونو

بیرده گئدین محله نی تئز هایلایین

بولوم بولوم حالوانی سیز پایلایین

لاپ کوچه دن دوردو قاطار قونشولار

آغلایا آغلایا حالوا آلدیلار

آخشام اولدو هاممی ییغیشدی ائوه

گلین باجی یئزنه داداش هم نوه

یاواش یاواش هرکس حالوا یئییردی

بیر تیکییه اوچ صالاوات دییردی

آتام سالدی باشیما بیردن قاپاز

تبرریکدی یه حالوا آخماق بیرآز

معجیزه نین عیللتی آنجاق منم

ایندی آغیللی هامی آخماق منم

هرکس اباالفض دییرک توتدو دم

حیطتده سانجیلدی اوجا بیر علم

چاتدی خبر هر یئره گلدی قوناق

اولدو نهایت ائویمیز بیر اوجاق

گونده دولور آخ نئجه پولدان علم

باخ بئله یوخوللوغسا چکدیک قلم





گؤنده ر 100 درجه کلوب دات کام گؤنده ر
بؤلوم : وطن
چهارشنبه 11 آذر 1394 :: نويسنده : فتح اله پناهی عربلی
+0 به یه ن

                اولدور منی

 

نرگس مستین له قیلما بیر نیگاه اولدورمنی

چک ستم له تیغ نازین بی گوناه اولدورمنی


هرنه قیلسان حاضیرم حوکمون روادیر آی صنم

من غلام درگهم سن پادشاه  اولدور منی


فانی دونیاده بو غملر له یاشاییش خوش دئییل

گوزلریم ده قانلی یاش سینه مده آه اولدورمنی


جان منای عشقیده جانانه قوربان ایله دیم

فرقی یوخدور یا بوگونده یا صاباح اولدورمنی


بیلمه دیم وئردیم کونول سن تک وفاسیز دیلبره

قاتیل اولسون قوی منه بیر اشتباه اولدورمنی


سویله اول شوخه عربلی من اولومدن قورخمورام

قیل جفا و نازینی ای قبله گاه اولدورمنی






گؤنده ر 100 درجه کلوب دات کام گؤنده ر
بؤلوم : وطن
چهارشنبه 11 آذر 1394 :: نويسنده : فتح اله پناهی عربلی
+0 به یه ن

          پارساآباد

مهندیس پارسادان آلینمیش آدی

پارساآباد عنوانلی نیگار بیزیمدی

قویوبدی حیرتده یابانچی یادی

بو آلتین تورپاغلی دیار بیزیمدی

 

چالیشقان اوغولو چالیشقان قیزی

اینان کی سایسیزدی پارلاق اولدوزو

قاشیندا یئرله شیب جوشغون آرازی

اودور گول چیچک لی باهار بیزیمدی

 

چکنده آدی نی باشیم اوجالیر

باخیب گوزللیگه قلم گوج آلیر

نه بیر دیلدن دوشورنه ده قوجالیر

شان شوکت بیزیمدی ووقار بیزیمدی

 

کوچری قوشلارین قیشدا یوواسی

دردیمین تاپیلیر بوردا داواسی

آتالار آنالار خئییر دوعاسی

ایاق باش برکت بو وار بیزیمدی

 

سئللره بوغولان ساراسی بیزیم

مرهمی اوزگه نین یاراسی بیزیم

آغ اونو تهرانین قاراسی بیزیم

بوش الده یئرله شن قابار بیزیمدی

 

اکینچیم بئلی نی الیندن آتمیر

سویوقدا ایستی ده ائوینده یاتمیر

حاییف اوز آغزینا اوز الی چاتمیر

بولوک دن قورولان دووار بیزیمدی





گؤنده ر 100 درجه کلوب دات کام گؤنده ر
بؤلوم : وطن
چهارشنبه 11 آذر 1394 :: نويسنده : فتح اله پناهی عربلی
+0 به یه ن

دمیرچی قارداشیمین گولوم شعیرینه جاواب

                    گولوم


قوی آلتینی اوتسون ساعات

یاتانلاری بیر بیر اویات

ابدی عشقیمیز راحات

        دوشسون دیلدن دیله گولوم

        بیرآز گوزله هله گولوم

 

سانما سن سیز من گولورم

نه لر چکیرسن بیلیرم

داریخما جئیران گلیرم

        سن یولا سو چیله گولوم

       بیر آز گوزله هله گولوم

 

اینان کی هیجرانین دادی

هئچ بیر ووصالدا اولمادی

لذذت ده اینتظاردادی

         سر گوزونو یولا گولوم

          بیر آز گوزله هله گولوم

 

سئوگی واخت وعده تانیماز

نه قیش پاییز نه ده کی یاز

گوروش مه یه آز قالدی آز

        چیخ ائودن بیر چوله گولوم

         بیر آز گوزله هله گولوم





گؤنده ر 100 درجه کلوب دات کام گؤنده ر
بؤلوم : وطن
سه شنبه 10 آذر 1394 :: نويسنده : فتح اله پناهی عربلی
+0 به یه ن

              حیات یولداشیم

دو

عومورلوک دونیادا باشیمین تاجی

گاه منه یولداشدی گاهداکی باجی

یانیندا چکمه دیم بیر آندا آجی

منی شاعیر ائدن یولداشیم اولدو

 

قارانلیق گئجه مین چیراغی اولوب

کونلومون زولفونون داراغی اولوب

هرزامان دیلیم ده  سورا غی اولوب

منی شاعیر ائدن یولداشیم اولدو

 

آغیزدا لذذتیم هم تامیم دی او

سئوگی ده تانری دان انعامیم دی او

یازیب یاراتماغا ایلهامیم دی او

منی شاعیر ائدن یولداشیم اولدو

 

عومور کاروانیمین ساربانی دی

شاعیر اوره گیمین او سولطانی دی

دییم مهربانلار مهربانی دی

منی شاعیر ائدن یولداشیم اولدو

 

خسته لیک چاغیندا باشیمین اوسته

توکوبدو گوز یاشی یاشیمین اوسته

محببت چیلییب آشیمین اوسته

منی شاعیر ائدن یولداشیم اولدو

 

دردیمی هر زامان قاناسی دیر او

محببت گولونون سوناسی دیر او

بیردنه زهرامین آناسی دیر او

منی شاعیر ائدن یولداشیم اولدو

 

اونونلا چیر پینار هر آن اوره گیم

بیرجه خوشباخت لیغی منیم دیلکیم

وارلیغیندان باشقا نه دیر گرگیم

منی شاعیر ائدن یولداشیم اولدو

 

اصلی ساربانلاردی آدی فلان کس

عومرومون لذذتی دادی فلان کس

داها من نه دییم بودوفلان کس

منی شاعیر ائدن یولداشیم اولدو

 

قیناما کوچه نین چرچی سی واردی

مالینین یاخجی سی هم پیسی واردی

آرواددی آلماغا هوسی واردی

منی شاعیر ائدن یولداشیم اولدو

 

یازدیغیم سوزلری قورخو سان میین

سیز قلم اهلی سیز حاققی دان میین

تهمت آتشینه آلوولان میین

منی شاعیر ائدن یولداشیم اولدو

 

خیردا سوز صوحبتی واری بوشلیین

دونیادا وارلیغی دوزو خوشلیین

گلین بیر اوره گدن سیز آلقیشلیین

منی شاعیر ائدن یولداشیم اولدو



گؤنده ر 100 درجه کلوب دات کام گؤنده ر
بؤلوم : وطن
یارپاق لار : 1 2 3 4
 
   
 
Powerd By : ARZUBLOG.COM Theme Designer : MyTheme.ir