بلاقا گؤره




بؤلوم لر
یولداش لار
     
سایغاج
rss feed
عربلی
تورکجه طنز شعیرلر
آنا یارپاق       وطن       ایلگی      
پنجشنبه 29 مرداد 1394 :: نويسنده : فتح اله پناهی عربلی
+0 به یه ن
        الله الله (2)

روزگارین چوخلو  واردی محنتی

ایلده بیر سری چتین آللیق اتی

قالخیب هارا آذوقه نین قیمتی

 

               سفرمیزده سوغاندی الله الله

               زامان یامان زاماندی الله الله

 

دسته دسته گلیر ائوه قبض لر

پولونا باخاندا دایانیر نبض لر

نیله سین الله بویازیق کارگر

 

               گاز و برق و سوداندی الله الله

               زامان یامان زاماندی الله الله

 

طبیعی خروس قارا بودین یئیردیک

آغ تویوغو هریئرده پیسلئییردیک

آدینا امیرکه تویوغو دئییردیک

 

              ایندی اودا گراندی الله الله

              زامان یامان زاماندی الله الله

 

نه بانک تانیردیم نه ده وام آلماغی

الده پوشه صف دالیندا قالماغی

رئیس لره واسطه لر سالماغی

 

              بورچ بئلیمه قالاندی الله الله

              زامان یامان زاماندی الله الله

 

هرنه قدر گلسه فشاردا قولا

اکینچی نین محصولو گئتمیر پولا

بورچ گوتورور کود و سم وبذر آلا

 

             اوزونه قالان ساماندی الله الله

             زامان یامان زاماندی الله الله

 

باشی قاریشیب سیاسته دولتین

اقتصادا گورموروک هئچ هممتین

یانان یوخدو دردینه بو میللتین

 

             بیرجه وئرگی اوماندی الله الله

             زامان یامان زاماندی الله الله

 

جاوانلارین هدر گئدیر دورانی

بکارچیلیقدان سومورور قلیانی

توستوسو البتته آلیب هر یانی

 

            سانکی چندی دوماندی الله الله

            زامان یامان زاماندی الله الله

 

ائولنمه یه یوخلئییر اوغلان جیبین

جراتی یوخ سککه کسیر چون کبین

گتدی بیزه زمانه بو پول دبین

 

            هئچ دئمز بو جاواندی الله الله

            زامان یامان زاماندی الله الله

 

قیز آتاسی عومور کئچیردیرناساز

هی دئییری ائلچی یه صبر ائت بیرآز

چاره سی یوخدور نئجه آلسین جاهاز

 

              چوخ بئله توی یوباندی الله الله

               زامان یامان زاماندی الله الله

 

 

دانشگاه اولماز بیزیم آزاد تکی

شهریه سی لاب قورودا خیرددگی

سئل کیمی توکسون بازارا مدرکی

 

            خلقی سویان توکاندی الله الله

             زامان یامان زاماندی الله الله

 

پول وئریب البتته آلیر لیسانسی

اولماسا پارتی ایشه یوخدو شانسی

دوز دئییل هئچ تحصیل،ایشین بالانسی

 

              یازیق بکار دولاندی الله الله

               زامان یامان زاماندی الله الله

 

یالتاخلانیر میللت عریضه سینده

تظاهر ایلئییر فریضه سینده

لازیم اولسا یئره قویور اوزونده

 

            مقصد اوچون پلاندی الله الله

             زامان یامان زاماندی الله الله

 

قبله دئییل بیزلره ایندی حجاز

خلق قیلیر دوربینه خاطیر ناماز

چیرکین حیاتیندا حلل اولور نیاز

 

             دین دئدیگین گوماندی الله الله

              زامان یامان زاماندی الله الله

 

گزیردیم تای توشلاریملا قول قولا

ذرره قدر فیکر ائله مزدیم پولا

عومروده آسوده سالیردیم یولا

 

             گرفتارام هاچاندی الله الله

             زامان یامان زاماندی الله الله





گؤنده ر 100 درجه کلوب دات کام گؤنده ر
بؤلوم : وطن
دوشنبه 26 مرداد 1394 :: نويسنده : فتح اله پناهی عربلی
+0 به یه ن
                           اولدورجک 

نه منی عزراییل الله، نه فلک اولدورجک 

نه فلاکت ،نه بوران قیش، نه کولک اولدورجک 

نه تورروم ،نه باهالیق، نه تاپیلماز داوالار 

نه ده پولسیز بوشهرده پله سک اولدورجک 

حوکومت باخماسادا آجلیقا جان وئرمییجم 

نه بکارلیق، نه ده بورجلار، نه چورک اولدورجک 

یاناجاق اولسا باها، غم دییل هئچ ،وار ایاغیم 

نه ماشین سیز کوچه لرده یئریمک اولدورجک  

نه قدر وارسادا دردیم دوزه بیللم هله لیک 

نه ده غملرله دولو قانلی اوره ک اولدورجک 

طاماخیندان تاری نین امری نی بیهوده سایان 

بیرجه جننت دن آتیلمیش بو ملک اولدورجک 

آلدانیب شیطانا بو تجربه دن درس گوتورن 

اوزو اولموش بئله اوستاد کلک اولدورجک 

اولوب اوولده فرشته، سورا چونموش بشره 

اودوکی بیزده دییللر بیجلک اولدورجک 

سوز یالان ،آند یالان، بیرده کی غیبت پئشه سی 

کیمه بوهتان، کیمه آتمیش متلک، اولدورجک 

گاهی مین حوققه ایله دونیادا مال توپلایاجاق 

یازیغین، مظلومین حاققین یییه جک اولدورجک 

گاهدا مدداح اولاراق میللته قان آغلاداجاق 

گونده اویدیرما روایت دییه جک اولدورجک 

یادا بعضا گوروسن قاضی اولوب محکمه ده 

گوز یوموب حاققی ناحاق ائیلییجک اولدورجک 

حوکومت فارس دیر، اوزوم تورکم و الله دا عرب 

هانسی دیلدن بو قدر دردی دئمک اولدورجک 

یاشا رویاده < عربلی> هله لیک چونکی سنی 

بو  قدر  فیکر و  خیال  آرزو  دیلک  اولدورجک





گؤنده ر 100 درجه کلوب دات کام گؤنده ر
بؤلوم : وطن
سه شنبه 20 مرداد 1394 :: نويسنده : فتح اله پناهی عربلی
+0 به یه ن
                  تلفون

قولاغیم سسده دیر گوز اس ام اسده

سئوگی حرارتی تلفو نو مدادی

داها زنگ ائله میر بیر بویو بسته

سسی نین حسرتی تلفونومدادی


سحیرلی گوزلری سالدی اوسینا

دوشدو سئودا اودو سی پی یو سینا

هرزه دانیشمادی بیر آن او، سینا

عشقین صداقتی تلفونومدادی


هر گئجه ویبره ده او خلوتده دیر

دویماغا سسی نی یار یولون گودور

بیر سیگنال آلجاغین لاب یئری دیدیر

انتظار محنتی تلفونومدادی


سئوگی فضاسیندا
آنتنی دولمور

ویروسا توتولوب زنگیده چالمیر

هی قاچیر الیمه جیبیم ده قالمیر

مجنون موصیبتی تلفونومدادی


تک اونا باغلاندی باخ بو دونیادا

داش اولدو اوره یی سالمادی یادا

وئردی عبث یئره شارژی نی بادا

بلاسی ،آفتی تلفونومدادی


وئردیگی سوزلری ایلقاری داندی

یاندی عشق اودونا آی سی سی یاندی

نه بیر نظر قیلدی نه ده کی قاندی

ساختا محببتی تلفونومدادی


بیر قارا یئل کیمی اسن دن سورا

سئوگی علاقه سین کسن دن سورا

گلیب باریشمادی کوسن دن سورا

گئچمیش حلاوتی تلفونومدادی


محببت دوشمه سه اوره گه گوزه

ال باشا چیرپیلار یاداکی دیزه

بیر بئله سئوگی نین نه خئیری بیزه؟

آلین بو عبرتی تلفونومدادی


سنین دیر اوره گیم هی دییه دییه

بیر سنه باغلانیر بش ده اوزگییه

گر دئسن اینانیم من نئجه ؟ نییه؟

یالانچی صوحبتی تلفونومدادی






گؤنده ر 100 درجه کلوب دات کام گؤنده ر
بؤلوم : وطن
شنبه 10 مرداد 1394 :: نويسنده : فتح اله پناهی عربلی
+0 به یه ن

حورمتلی یاور شاهی جنابلارینین تقاعوده چیخما مناسبتیله 


** تقاعود*


اوتوز ایلی سالیب یولا 


قاتیلمادین قالما قالا 


جاوانلیغین کئچدی بالا 

گوزدن آخید یاش آروادا 


قال ائوده یولداش آروادا 



اولدو دولته خیدمتین 


آرتمادی شٵنین عززتین 


تاپ ایندی ائوده حورمتین 


خیدمته قاتداش آروادا


قال ائوده یولداش آروادا 



درده غمه دوشدو جانین 


سالمادی هئچ یادا خانین 


هر ایشی بئله ، دونیانین 


ایندی گئت ،ای باش آروادا


قال ائوده یولداش آروادا 



قوجالمیسان گئت ائوینه 


سیخیل بوخاری دیبینه


گوون مه قارداش جیبینه 


دانیشما چاش پاش آروادا


قال ائوده یولداش آروادا 



یوخسا آتاللار ائشیگه 


قاپیدا دونرسن کئشیگه 


باخارسان ایته پیشیگه 


دیغیرلاتما داش آروادا


قال ائوده یولداش آروادا 



آل اله هی قارا بئلی


حیطده توپلا زیبیلی


بلکه اولدو شیرین دیلی


اک بورانی ، ماش آروادا


قال ائوده یولداش آروادا 



تقاعودون دوشدو قیشا 


سویوقدو قوی پاپاق باشا


قالان گونلری شاد یاشا 


حاضرلاد هی آش آروادا


قال ائوده یولداش آروادا





گؤنده ر 100 درجه کلوب دات کام گؤنده ر
بؤلوم : وطن
یارپاق لار : 1
 
   
 
Powerd By : ARZUBLOG.COM Theme Designer : MyTheme.ir